TÜRKMENISTANDA BMG-NIŇ ÇÖLLEŞMÄGE GARŞY GÖREŞ BARADAKY KONWENSIÝASY

Çölleşmäge garşy göreş baradaky Konwensiýa (ÇGGK) - daşky gurşaw baradaky üç Rio-konwensiýalarynyň biridir. ÇGGK-niň düzgünlerini işläp düzmek we ara alyp maslahatlaşmak Birleşen Milletler Guramasynyň (BMG) ýolbaşçylygy astynda ýerine ýetirildi.

BMG-niň 1992-nji ýylyň Oguz aýynda bolan daşky gurşaw we ösüş baradaky konferensiýasy (UNCED - Rio-de-Žaneýroda bolan "Ýer planetasy" boýunça ýokary derejede duşuşyk ady bilen bellidir) BMG-niň Baş Assambleýasyna gurakçylyk we çölleşme hadysasy sebäpli kynçylyk çekýän ýurtlarda çölleşmäge garşy göreş barada Konwensiýany işläp düzmek boýunça gepleşikler geçirmek üçin Hökümetara Komitet döretmegi teklip etdi. Komitet 1993-nji ýylyň başynda döredilip, Konwensiýa kabul edilýänçä 5 gezek taýýarlyk mejlisini geçirdi. Konwensiýa 1994-nji ýylyň Oguz aýynyň 17-ne Pariž şäherinde kabul edildi we şol ýylyň Garaşsyzlyk aýynda ýurtlar üçin Konwensiýa gol çekmeklik mümkinçiligi açyldy. 1996-njy ýylda ony 100-den gowrak döwlet gol çekip ykrar edensoň, Konwensiýa güýje girdi.

Umumy meýdanynyň 80 %-den gowragyny çöl tutýan Türkmenistan 1996-njy ýylda BMG-niň Çölleşmäge garşy göreş baradaky Konwensiýasyna goşuldy.

Konwensiýanyň maksady – gurakçylyk we çölleşme hadysasy sebäpli kynçylyk çekýän ýurtlarda netijeli çäreler geçirmek arkaly çölleşmäge garşy göreş alyp barmakdyr. Bu çäreler XXI asyryň gün tertibine gabat gelýän we bu ýurtlarda durnukly ösüşi gazanmaga ugrukdyrylan toplumlaýyn çemeleşmegiň çäklerinde baglaşylan özara hyzmatdaşlyk baradaky ylalaşyklar bilen bilelikde alnyp barylmalydyr.

Konwensiýanyň Ýokary karar kabul ediji edarasy Konwensiýanyň Taraplarynyň (ýurtlaryň) Konferensiýasydyr (TK). Ol öz mumkinçilikleriniň çäklerinde Konwensiýany netijeli ýerine ýetirmek üçin zerur bolan kararlary kabul edýär. TK-niň esasy wezipeleri şulardan ybaratdyr: Konwensiýanyň ýerine ýetirilişine yzygiderli gözegçilik etmek; Taraplaryň geçirýän ççrelerini goldamak we olar barada özara tejribe alyşmaklyga ýardam etmek; Taraplaryň borçlaryny ýerine ýetirişleri barada taýýarlan hasabatlaryna seretmek we olar barada teklipler bermek; Konwensiýany ýerine ýetirmek üçin zerur bolan kömekçi edaralary döretmek.

Türkmenistanda Milli utgaşdyryjy merkez hökmünde Çöller, ösümlik we haýwanat dünýäsi milli instituty (ÇÖHDMI) bellendi. 1997-nji ýylda Çölleşmäge garşy göreş hereketleriniň Milli maksatnamasy işlenip düzüldi. Türkmenistanyň BMG-niň daşky gurşaw baradaky konwensiýalaryndan we maksatnamalaryndan gelip çykýan borçlarynyň ýerine ýetirilişine gözegçilik etmek we amala aşyrylýan çäreleri utgaşdyrmak maksady bilen 1999-njy ýylda Döwlet işjeň topar döredildi. Işjeň topar ýylda bir ýa-da iki gezek öz ýygnagynda konwensiýalaryň we maksatnamalaryň ýerine ýetirilişi baradaky maglumatlary diňleýär.

Format: Rar

Ululyk: 427 Kb

Doldurmak: UNCCD_tm.pdf